Parliament Monsoon Session ṭan a ni

Parliament Monsoon Session chu nimin khan neih ṭan a ni a, session ṭanniah eptuten ram chhunga thil man sang, GST rate tihsan leh Agnipath scheme duh lohna lantira an aubuai nghal avangin, House pahnihah inkhawm hi tihtawp a ni.

Rajya Sabha chairman M Venkaiah Naidu chuan eptu member-ten lungawi lohna lantira House laia an chhuah khawm avangin inkhawm hi nimin atan chawhma dar 11-ah a titawp a ni. Lok Sabha lamah pawh inkhawm hi tihtawp ni mah se, chawhnu dar 2-ah an chhunzawm leh thung. Mahse inkhawm chhunzawm a nih leh hnuah pawh eptu member-te hi House laiah kalkhawmin, thil man sang chak lutuk an duh lohna an lantir zui leh nghal. Member-te an aubuai zui zel avangin reilote hnuah nimin atan rorel inkhawm tihtawp a ni zui leh bawk.

Sorkar laipui chuan tun session chhunga ngaihtuah turin bill 24 a ruahman a, heng zingah hian Cantonment Bill, Multi-State Cooperative Societies (Amendment) Bill leh Insolvency and Bankruptcy Code (Amendment) Bill te an tel. Hei bakah hian Special Economic Zones Act, 2005 ennawnna tur Development of Enterprises and Services Hubs Bill, Geographical Indications of Goods (Registration and Protection) (Amendment) Bill, Warehousing (Development and Regulation) (Amendment) Bill leh Competition (Amendment) Bill pawh an tel a ni.