NDA Vice President candidate-in nomination paper thehlut ; Eptuten joint candidate atan Margaret Alva an ruat

BJP kaihhruai National Democratic Alliance (NDA)-in Vice President thlan tura candidate tana a ruat, Jagdeep Dhankar chuan nimin khan nomination paper a thehlut.

Kum 71 mi, Dharkhar hi NDA Vice President candidate atana ruat a nih hnuah, Pathianni khanWest Bengal governor a nihna ṭangin banna a thehlut nghal a ni. Nimina nomination paper a thehluhnaah hian prime minister Narendra Modi, cabinet minister Rajnath Singh leh Amit Shah bakah, BJP president JP Nadda-ten an ṭawiawm.

Eptu candidate Margaret Alva
Eptu party-te chuan joint candidate atan union minister hlui leh Congress hruaitu hlun, Margaret Alva an ruat.

Pathiannia New Delhi-a all-party meeting an neihah, Nationalist Congress Party (NCP) hotu Sharad Pawar chuan joint candidate tur hi a puang a, eptu party 17-ten lungrual takin candidate tan Alva hi an pawm tih a sawi.

Kum 80 mi, Alva hi union minister hlui a nih bakah Goa, Gujarat, Rajasthan leh Uttarakhand Governor-te pawh a lo ni tawh bawk. Vawiinah nomination paper hi a thehlut ang.