Loneitute'n sorkar din MSP Panel an pawm lo ; Panel-ah Farm Law thlawptute an tel niin an sawi

Loneitu pawl inzawmkhawm, Samyukta Kisan Morcha (SKM) chuan an thil phut zinga pakhat, mininum support price ngaihtuah tura sorkar laipuiin committee a din chu an pawm lo. He committee-ah hian sorkarin a ṭhiah tak, Farm Law thlawptute an tel niin an sawi.

Sorkar laipui chuan hun rei tak loneituten an dodal avanga Farm Law pathumte a sut leh hnuah, MSP chungchang ngaihtuahtu tur committee hi din a tiam. A intiam aṭanga thla riat hnu, Thawhṭanni khan he committee hi dinin chairman-ah agriculture secretary hlui Sanjay Agarwal ruat a ni a, SKM aiawh member pathum dah tel an ni.

SKM hruaitu Abhimanyu Kohar chuan nimin khan MSP panel an pawm loh thu hi sawiin, "SKM non-political leader-ten meeting kan nei a, hruaitu kal zawngte hian sorkar panel din hi an pawm lo vek a ni. Sorkarin committee-a loneitu hruaitu a dahte hi Delhi border-a farm law duh lohna kan lantir chhung zawng pawha engmah ti ve lo, he dan duh lohna lantir ve lote an ni," a ti. Kohar chuan MSP panel-ah hian company lam aiawhte a dah tel niin a sawi bawk.

Loneitu pawl inzawmkhawm, SKM hnuaiah ram chhung hmun hrang hranga loneitute chuan Delhi border-ah sawizui hlawh tak, Farm law pathumte sut leh tura sorkar laipui phutin, kum khat chhung zet lungawi lohna an lantir a ni. Loneitute'n nawrh an huaihawt chhunzawm reng hnuah, nikum November thla khan sorkar laipui chuan farm law pathumte chu a ṭhiat leh ta a ni. Prime minister Narendra chuan loneitute thil phut, MSP chungchang ngaihtuah turin committee din a tiam bawk a ni.

Thawhṭanni khan Agriculture Ministry chuan MSP panel din a nih thu puangin,chairman-ah Sanjay Agarwal dah niin, member-ah Niti Aayog member Ramesh Chand, agri-economist CSC Shekhar, IIM- Ahmedabad aṭangin Sukhpal Singh leh Commission for Agricultural Costs and Prices (CACP) senior member Naveen P Singh-te ruat an ni. Anni bakah hian loneitu lam aiawh atan national award pawh lo dawng tawh Bharat Bhusan Tyagi, SKM member pathum, leh loneitu pawl dang aṭangin member panga ruat an ni bawk. Farmer cooperative, IFFO chairman Dilip Sanghani leh CRNI general secretary Binond Anand-te pawh telh an ni a; agricultural university-a senior member, central sorkara secretary panga leh Karnataka, Andhra Pradesh, Sikkim, leh Odisha chief secretary-te pawh an tel bawk.