Eptu party hruaituten thil man sang duh lohna lantir

Eptu party hruaitute chuan nimin khan Parliament complex-ah ram chhunga thil man sang chak lutuk duh lohna an lantir.

Parliament complex-a Mahatma Gandhi lim bula lungawi lohna lantir zingah hian Congress party hruaitu Rahul Gandhi bakah, Nationalist Congress Party (NCP) hotu Supriya Sule, Samajwadi Party hruaitu Ram Gopal Yadav leh Shiv Sena hruaitu Priyanka Chaturvedi te an tel. Sorkar laka lungawi loa ṭhute aupuiin, Congress member-te chuan LPG cylinder man tihpunna chu sut turin an phut bawk.

Sorkar laipuiin Goods and Services Tax (GST) rate a ennawn chu Thawhṭanni aṭang khan hman ṭan a ni a, chaw lam chi, food item-ahte GST hi a la tawh a ni.

Rajya Sabha-a leader of opposition, Congress MP Mallikarjun Kharge chuan food item-ah GST 5% lak chu mipui nawlpuiten an tuar dawn a, Parliament House chhungah chuan GST lak an duh lohna hi an lantir zel dawn tih a sawi.

Lok Sabha-a Congress whip, Manickam Tagore chuan eptu party-te chuan thil man sang zel leh GST chungchang hi sawiho an duh a, mahse sorkar chuan a remtih loh avangin rorel inkhawm pawh a titawp niin a sawi. Mahse rorel chhunzawm a nih hunah an nawr zui leh dawn tho tih sawiin, engvangin nge sorkar chuan sawiho chu a hlauh tlat tih a zawt nghal bawk.