PM leh CM-te poll rally neih khap turin phut
Shiv Sena hotu Uddhav Thackeray chuan Election Commission hnenah political party hrang hrangte rualkhai taka an kal theih nan, Prime Minister leh chief minister zawng zawngte chu inthlan dawna rally huaihawt khap turin a ngen.
Thackeray chuan, ‘PM leh CM-te hian election rally neihnaah mipuite hip nan thil hrang hrang an puang ṭhin. Rorellai party-in mipuite hnena thil an tiamsak chuan political party dangte thutiam aiin mipui rilruah a tla na zawk ṭhin a ni”, tiin hei hi a fel tawk loa a ngaih thu a sawi. Hemi rual hian rorellai party-te chu inthlan dawna an thutiamte hlen loah a puh bawk.
Shiv Sena hotu chuan Maharashtra Chief Minister Devendra Fadnavis chuan inthlan dawnah Kalyan-Dombivali municipal corporation tan cheng vaibelchhe 6,500 pek a tiam a, Prime Minister Narendra Modi pawhin Bihar tan cheng vaibelchhe nuai 1.25 pek a tiam bawk a, mahse hengte hi inthlan zawh hnuah cheng khat pawh pek an ni lo niin a sawi.
Prime Minister chu a party tihchak dan ringawt ngaihtuah lo a, ram dinhmun siamṭhaa thuam chak dan ngaihtuah zawk tur te, chief minister-te pawh rally neihna hmun a pianga tel tum loa an state chhung dan leh thupek dinhmun siamṭhat te, loneitute chawikanna turte ngaihtuah zawk turin Thackeray chuan a ti.