Loneitute leiba ngaidam dawn lo

Uttar Pradesh-a loneituten an leiba ngaidam tura an ngenna chu chhangin, Agriculture Minister Radha Mohan Singh chuan loan ba te hi ngaidam loin, a pung tlem zawka puk tir dan an ngaihtuah dawn tih a sawi.

State chhunga loneitute loan bat ngaihdam chungchang chu state sorkar thutlukna a ni tih a sawi a, national level-ah chuan hetiang rawtna hi ala awm lo tih a sawi. State ṭhenkhat - Maharashtra, Punjab, Tamil Nadu leh Karnataka-te’n loneitute loan ba an ngaihdam tur thu an sawi pawh state sorkar tinte thutlukna siam tur a ni a ti a, hemi rual hian sorkar laipui chuan subvention scheme hnuaiah loneitute chu hamṭhatna a pe sa tawh tih a sawi.

Subvention scheme hnuaiah loneitute chu shop-term crop loan, cheng nuai thum chin pek an ni a, a pung hi kum khatah 7% a ni. Loan la tuten a pek hun chhung tura an pek hman chuan sorkar laipui chuan kum khatah incentive 3% a pe tel bawk a, hei vang hian loan rul ṭhate tan chuan a pung hi 4% chauh a ni, a tibawk.