Parliament in hnih rorel inkhawm titawp leh

Parliament Monsoon session neih mekah, nimin khan Rajya Sabha leh Lok Sabha-ah eptu member-ten ram chhunga thil man sang zel chungchang sawiho phuta an au buai leh vangin inkhawm tihtawp a ni.

Lok Sabha speaker Om Birla chuan eptu member-te au bengchheng avanga rorel inkhawm titawpin, mipuiten Parliament chu hna thawk turin an duh a, rorel thei loa au bengchhengte chuan ṭha taka thil sawiho zawk turin a ngen. Eptu MP-te hian House chhungah 'Gabbar Singh strikes again' tih banner te an keng a ni. An zawhna hrang hrang neihte chhang turin prime minister Narendra Modi pawh rorel inkhawmah tel ngei tura an phut thute an sawi bawk. Inkhawm tihtawp lailawk a nih hnuah chawhnu dar 2-ah chhunzawm leh a ni a, mahse rorel thei loa member-te an aubuai leh nghal avangin nimin atan rorel inkhawm hi tihtawp a ni ta a ni.

Rajya Sabha-ah pawh chairman M Venkaiah Naidu chuan chawhnu dar 2 thleng inkhawm a titawp ve bawk. Leader of Opposition, Congress MP Mallikarjun Kharge leh eptu member dangte chuan rule 267 hnuaiah ram chhunga thil man sang zel chungchang chu sawiho an phut a, Kharge chuan tun hnaia food items, LPG cylinder leh thil dang man tihsan chuan mi zawng zawng a nghawng a ni, a ti.

Congress hruaitu leh Rajya Sabha MP Jairam Ramesh chuan prime minister Narendra Modi kaihhruai sorkarin thil man sang leh GST tihsan a nih chungchang sawiho a duh tlat loh avangin Parliament chuan a tuar phah niin a sawi.

Thawhṭanni aṭanga neih ṭan a nih aṭangin eptu member-te chuan thil man sang, GST rate tihsan, Agnipath scheme-te sawiho phutin House chhungah an aubuai nghal a ni. Session hi August 12 thleng neih a ni ang.

Nimin khan eptute chuan Parliament complex-a Mahatma Gandhi lim bulah lungawi lohna an lantir leh bawk.