SC-in Aug 10 thleng Nupur Sharma interim protection pe

Supreme Court chuan prophet Muhammad chungchang mawi lo taka a sawi avanga a laka FIR eng emaw zat thehluh, BJP hruaitu a nihna aṭanga suspend mek Nupur Sharma chu August 10 thleng interim protection a pe. Hemi chhung hian a lakah eng action mah lak a ni thei rih lo ang, a ti.

Nupur Sharma hian a thusawi avangin state eng emaw zatah thubuai siamsak a ni. Sharma hian state hrang hranga a laka FIR thehluh a nih hnuah SC-ah hian man a nih lohna tura humhimna pe turin a ngen a ni. A lawyer chuan thaha vauna pawh a dawng niin July 1 khan a lo sawi tawh bawk. Mahse Supreme Court bench chuan a thusawi avanga ram puma buaina chhuak chungchangah, Nupur Sharma hi mawhphurtu liau liau a ni tiin a lawyer hi a chhang.

Sharma-i lakah hian Delhi, Maharashtra, Telangana, West Bengal, Karnataka, Uttar Pradesh, Jammu and Kashmir leh Assam-ahte FIR hi thehluh a ni. Court chuan Sharma-i lawyer-in state hrang hranga FIR thehluhte hmun khata chhungkhawm tura a ngen chungchangah, FIR thehluhna state-te hi an a ngaihdan a zawt bawk. August 10-ah Sharma ngenna hi ngaihtuah a ni leh dawn a, hemi hma chuan a lakah thubuai thar ziahluh belh theih a ni rih lo ang.