Kum 2021-ah India mi nuai 1 chuangin khua leh tui nihna thlauhthla

Kum 2021 chhung khan India mi 1,63,370 chuan India khua leh tui an nihna thlauhthlain, ram dangah khua leh tui nihna an nei. Hei hi kum 2019 hnua kum khata Indian citizenship titawp tam ber kum a ni.

Kum 2019 khan Indian Citizenship thlauhthla hi 1,44,017 awmin, kum 2020-ah 85,256 an awm bawk.

Nikum chhunga Indian citizenship thlauhthla zinga 78,284 hian USA-ah khua leh tuiah pawm an ni a, Australia citizenship pek 23,533, Canada-ah 21,597 leh UK-ah 14,637-ten khua leh tui nihna an dawng a ni.

Union minister of state for home Nityanand Rai chuan Lok Sabha-ah Bahujan Samaj Party hruaitu Haji Fazlur Rehman zawhna chhangin a tarlang a, nikum chhunga India citizenship thlauhthla, ram dang-a citizenship dawng hi ram 103-ah an awm a ni, a ti.

Zawhna a chhannaah, Minister Rai chuan Indian citizenship an thlauhthlakna chhan hi an mimal thil vang niin a sawi.