RJD MP hlui damchhung tang turin hrem

Rashtriya Janata Dal (RJD) MP hlui Prabhunath Singh chu kum 1995-a Masrakah MLA Ashok Singh thah thubuaiah thiam loh chantir a nih hnuin, nimin khan Jharkhand-a Hazaribagh district court chuan damchhung tang turin a hrem.

Prabhunath leh a unaupa Dinanath Singh bakah village chief hlui Ritesh Singh-te chu kum 22 kaltaa Janata Dal MLA Singh-a thah a nih chungchangah thiam loh chantir an ni. An pathum hian man nghal niin, Hazaribag central jail-ah dah an ni.

Bihar-a Masrakh bial JD MLA Ashok Singh hi kum 1995, July 3 khan a chenna-in beih a nih hnuin thah a ni a, pawikhawihtute hian bomb an hman bakah silai pawh an hmetpuak nasa hle.

Ashok Singh hian kum 1995 assembly inthlanah khan Prabunath Singh hi a hneh a, Prabhunath Singh chuan inthlan zawh aṭanga ni 90 chhungin Ashok Singh hi a dahbo tur thute a lo sawi tawh a ni.

Ashok Singh tualthah thubuai hi Patna court-ah ngaihtuah a ni a, mahse Patna High Court chuan kum 1997 khan Hazaribagh court-a ngaihtuah turin a ti a ni.