Motor-a Kashmir mi phuarbettu sipai chawimawi

Kashmir-a security force-te beitu, civil mi pakhat sipai jeep-a phuar bettu, army officer chu chawimawina, army chief commandation card hlan a ni.

Army thupuangtu Colonel Aman Anand chuan officer, Major Leetul Gogoi hi firfiakte do letna kawnga a thawh ṭhat avangin Chief of Army Staff’s Commendation (COAS) card hlan a ni thu a sawi a, tunhma lam pawhin a hnathawh ṭhat avanga hriat hlawh tak alo ni tawh thu a sawi. Hetih rual hian officer hnena chawimawina hlan hi jeep-a mi a phuarbeh chungchang nen inzawmna a neih loh thu a sawi nghal bawk.

April 14 khan Rakshak jeep-a mi pakhat phuarbeh, khawlaia tlankual pui chu internet lamah thehdarh a ni a, he thil thleng hi sipaite chuan chhui chiang turin thupek an tichhuak nghal a ni. Jeep-a an mi phuarbeh tlankualpui a nih lai hian, security force-te bei a, lunga tawng ṭhinte chu chutiang bawk chu an chan tur a nih thute sawi a ni bawk.

He thil thleng hian civil mite leh sipaite inkar boruak a tichhe zual a, Kashmir valley-ah mipuiten lungawi lohna lantirin tharum thawhna pawh a chhuah phah a ni.

Hetih lai hian sorkar leh sipaite chuan Major Gogoi-a thupek chu an ṭan thung a, official-te chuan mipuite lunga an tawng reng vangina an invenhimna tura an theih anga an chet ve a ngai niin an sawi. Sorkar pawhin sipaite hi thlawpin, officer-in-charge thiltih dan chu a ṭha hle nia a ngaih thu a tarlang a ni.