Indian Army-ten Pakistan post kahchhiatsak

Indian Army chuan Thawhlehni khan Line of Control (Loc) dunga Pakistan post-te chuan an kahchhiatsak tih an sawi. He hi ramri kaltlanga firfiak rawn lut ṭhinte lo danna tura an hmalakna peng pakhat a ni.

Army-te hian sipaiten ramhnuaia post an tih­chhiat sak lai video chu an tlangzarh nghal bawk a ni. He video hi second 22 awh chauh niin, concrete structure kahchhiah lai, meikhu leh kangmei chhuak nasa takte a lang. Mahse sipaiten beihpui an thlakna hmun tak hi chu sawichian a ni lo thung.

Sipaite chuan beihpui an thlakna atan hian rocket launcher, anti-tank guided missile leh automatic grenade launcher bakah recoilless guns-te an hmang niin an sawi.

Sorkar laipui chuan sipaite hmalakna chu a thlawp thu a sawi a, Defence Minister Arun Jaitley-a chuan he thil hi Kashmir-a boruak muan­awm a awm theihna tura hmalakna a nih thu a sawi.

Hetihlai hian Pakistan sipai thupuangtu Major General Asif Ghafoor chuan India-in Naushera-a Pakistan post an kap nia an sawi leh, LoC kaltlangin Pakistan sipaiten civil mite an kap nia sawi chu thu dik lo a nih thu a sawi thung.