Eptu-ten president can­didate tur thlang dawn

Eptu party hrang hrang hruaitute chu Zirtawpni hian inhmukhawmin, President thlan huna eptu pawl candidate tur an thlang dawn.

Congress Party president Sonia Gandhi chuan eptu pawlten president candidate inṭawm an siam theih nan hian hma lain, party hrang hrang hruai­tute pawh a lo be tawh a ni. Janata Dal-United hruaitu Nitish Kumar, National Congress Party hotu Sharad Pawar leh RJD hotu lu Lalu Yadav-te chu telephone-in a be tawh a, kar hmasa khan Trinamool Congress hotu Mamata Banerjee pawh a hmu tawh bawk. A fapa, Congress vice president Rahul Gandhi pawhin Left leader Sitaram Yechury leh Samajwadi Party hotu Akhilesh Yadav pawh a be tawh bawk.

Eptu pawlte president candidate tura hming an sawilan zingah hian Bengal Governor hlui Gopalkrishna Gandhi, Lok Sabha speaker hlui Meira Kumar, NCP chief Sharad Pawar leh JD-U hruaitu Sharad Yadav-te an tel. Mahse Pawar chuan candidate tura an rawtna hi a hnawl a ni.

President ṭanglai Pranab Mukherjee-a term hi July thla hian a tawp dawn a ni. Mukherjee chuan sorkarin a term hnihna hmang chhunzawm tura a ngen a nih loh chuan inthlanah chuh a tum tawh lo tih a sawi. Eptu party tam zawk chuan Mukherjee hi a term hnihna chelh tir duh mah se, Narendra Modi-a kaihhruai sorkar chuan an party mi leh sa dah an duh zawk nia sawi a ni.