Nun chhan nan mihring ka hmang : Major Gogoi

Indian Army officer, Major Nitin Leetul Gogoi chuan tunhnaia Jammu & Kashmir-a a jeep hmaa mihring a phuarbeh chhan sawiin, mipui lungawi loin nasa taka lunga an tawng avangin nunna chhan nan a motor-ah mihring a phuar bet ta mai tih a sawi. Mihring a phuarbeh avang hian mipui lungawi loin lung hmanga an tawng karah an him thei tih a sawi a, amah mai bakah sipaite nun chhan nana ti a nih thu a sawi bawk.

Major Nitin Leetul Gogoi hi Assam mi a ni a, tun hnai khan a hnathawh ṭhat avangin Army Chief Commendation Card hlan a ni. Major Gogoi chuan J&K-a inlakhran duhtu pawlte chuan nasa takin an bei tih sawiin, sipai te chu heng mite bei let tura thu a pek chuan buaina nasa zawk a chhuah dawn avangin, lungawilohna lantirtu zinga pakhat chu manin inphen nan an hmang tih a sawi.

He thil hi April thlaa Bandipora by-election neih ṭuma thleng kha a ni. Gogoi chuan Indo-Tibetan Border Police hnen

aṭangin phone call a dawng tih sawiin, anmahni beih tumtu mi mi 400-500 vel zet chu polling booth kawt­ah an pungkhawm tih hriattir a nih thu a sawi. An zinga pakhat, anmahni beih tuma kal chu manin, an phuarbet ta tih a sawi. Mipui pungkhawmte chuan lung leh hmanraw hrang hrang hmangin an bei zui a, hun eng emaw chen chu an lirthei hmang pawhin himna zawngin an chesawn thei lo a ni. Pungkhawmte chu an thiltih tawpsan tura vawi tam tak an ngen pawha an inbengdai mai duh loh avangin, Quick Reaction Team hnenah an mi man Farooq Dar-a an hnenah hruai turin a ti a, Farooq Dar chu jeep hmaah phuarbetin mipuite beihna aṭang chuan an tlanchhe thei hram tih a sawi.

Jammu and Kashmir police-te chuan Gogo-a lakah hian FIR an thehlut nia sawi a ni a, chhui zui mek a ni. Army Major Gogoi chetdan hi Punjab Chief Minister Amarinder Singh chuan fakawm a tih thu a sawi ve thung a, chawimawina hlan chu a phu reng niin a sawi. Punjab CM chuan hmun ralṭi leh ramri hnaihah awm army-te chu anmahni himna tura an inven theihna turin thuneihna sang zawk pek a duh thu a sawi bawk. Army Captain hlui Amarinder Singh chuan Gogo-a chetdan chu mi huaisen thiltih a nih thu a sawi a, a chunga thil thleng ni se hetiang thoa a chet ve tur thu a sawi a ni.

Army thupuangtu Colonel Aman Anand chuan Major Gogoi hi firfiakte do letna kawnga a thawh ṭhat avangin Chief of Army Staff Commendation (COAS) card hlan a nih thu a sawi a, hetih rual hian officer hnena chawimawina hlan hi jeep-a mi a phuarbeh chungchang nen inzawmna a neih loh thu alo sawi tawh bawk.