Babri Case : CBI court-a inlan turin Advani, Umar Bharti ko

Lucknow-a Special CBI court chuan BJP hruaitu eng emaw zat chu Babri Masjid tihchhiat thubuaiah vawiinah inlan turin a ko a, an zingah hian LK Advani leh Uma Bharti te pawh a tel.

Court hian vawiin hian Babri case-a inhnamhnawiha puhte hi thubuai a siamsak rin a ni. Mahse BJP hruaitu a kohte hian anmahni kher kal ngai lo tura phalsak turin an ngen nghal a ni.

April 19 khan Supreme Court chuan kum 1992-a thubuai ziah­luha lang, BJP hruaitu leh midangte thubuai hi ngaihtuah thar leh turin a ti a, he thubuai hi Rae Bareli aṭangin Lucknow-ah a sawn bawk.

SC chuan Babri mosque tihchhiat chu pawikhawihna lian tak, ram danpuiin sakhaw tin zalenna a pek palzutna a ni a ti a, CBI-in he

thila inhnamhnawiha puh VVIP-te thubuai ngaih­tuah thar leh tura a ngenna pawh a phalsak a ni.

Kum 1992-a Ayodhya-a Babri Masjid tihchhiat a nih avang khan FIR pa­hnih thehluh a ni. He thila inhnamhnawiha puh mi 28-te chungchang chu Luckow CBI court-ah ngaihtuah a ni a, an zinga paruk chu an thi tawh a ni. Advani leh mi dang parukte chu Rae Bareli court-ah thubuai siam­sak an ni thung. Thubuai siamsak zinga mi, VHP hruaitu Ashok Singhal leh Giriraj Kishore-te chu an thi tawh a ni.

Advani leh hruaitu dangte lak conspiracy charge siamsak hi kum 2001 khan special CBI court chuan a lo titawp tawh a, hei hi kum 2010 khan Allahabad High Court pawhin a pawmpui. Mahse thla hmasa khan Supreme Court chuan hruaitute laka conspiracy charge siam hi ngaihtuah ṭha leh turin a ti a, Lucknow-a special court chu thubuai siamsak tur hian thla khat hun a pek bakah, he thubuai hi kum hnih chhunga chingfel hman turin a ti bawk.

Babra Masjid tih­chhiat a nihna chhan hi Advani leh RSS hruaitu dangten masjid awmna hmunah Hindu temple sak a nih tur thu an sawi aṭanga rawn irhchhuak a ni. Hindu te chuan Muslim mosque awmna hmun hi Lord Ram pianna hmun niin an ngai a, an ngaithei lo hle a ni. Hei vang hian Babri Masjid hi tih­chhiat a, a awmna hmunah tem­ple sak an duh a ni. Babri Masjid tihchhiat a nih avang hian Hindu leh Muslim inkarah buaina nasa tak a chhuak zui a, mi 2,000 vel an thi a ni.