Saharanpur-a buaina chhuah chhanah UP CM puh

CPI-M chuan Uttar Pradesh-a Saharanpur khuaa Dalit leh hnam chungnung ho inkara buaina chhuah chhanah Chief Minister Yogi Adityanath-a kaihhruai BJP sorkar chu puhin, Dalit mite venhimna leh zangnadawmna ngaihtuahsak turin a phut.

Thuchhuah siamin CPI-M chuan, ‘CPI-M chuan Saharanpurp-a Dalit hnamten beih an tawk chu a dem hle a, he thil thleng vang hian Dalit mi pakhat thiin mi dang tam takin hliam an tuar a ni. He pawikhawihna hi upper caste ṭhenkhatte tih a ni”, a ti.

Bahujan Samaj Party (BSP) chief Mayawati-i rally buatsaiha tel Dalit hnamte hian an haw lamah beih an tawk a ni.

CPI-M chuan Dalit mite beihna inhnamhnawihte chung­ah action la turin sorkar a phut a, hei bakah hian Dalit hnamte chu venhimna pe tur leh, kut tuarte chu zangnadawmna pe turin an phut bawk. Dalit hruaitute lakah thubuai siamte pawh sut leh vek turin an phut bawk a ni.

Saharanpur-a buaina chhuak vang hian punkhawm khap nghal a ni a, boruak ṭha lo darh zel tur venna atan internet service pawh block nghal a ni bawk.