Kum 2021 chhungin heroin kg 5,600 chuang man

India law enforcement agency-te chuan nikum, kum 2021 chhung khan ruihhlo, heroin kg 5,651.68 an man. An ruihhlo man hlut zawng hi state tam tak annual budget aiin a tam zawk.

Ministry of Home Affairs (MHA) data-a tihchhuahah, nikum chhunga heroin man hlut zawng hi Rs vbc 40,000 dawn a tling. Kum hmasa, 2020 aiin nikuma ruihhlo man hi 72% in a tam zawk a ni.

Nikuma ruihhlo man zingah kg 3,000 chuang hi Mundra port aṭanga man a ni. Mundra port aṭang hian Directorate of Revenue Intelligence (DRI) chuan heroin kg 2,988.22 an man a, mi pahnih an man tel bawk. He thubuai hi a hnuah National Investigation Agency (NIA) kutah an hlan.

Home Ministry chuan sorkar-in ruihhlo doin kawng hrang hrangin hma a la tih a sawi a, kum 2016 khan ministry, department, central leh state law enforcement agency-te'n thawhhona ṭha an neihna turin Narco Coordination Centre (NCORD) pawh din a ni, a ti. Kum 2019 khan 4-tier structure-in siamṭhat a ni a, union home secretary kaihhruai Apex Committee, special secretary (IS) kaihhruai Executive Committee, chief secretary kaihhruai State Level Committee leh district magistrate kaihhruai District Level Committee-te siam an ni. Ramri kaltlanga ruihhlo tawlhluh ṭhin chungchangah Myanmar, Bangladesh, Sri Lanka leh Pakistan nen Director General level inbiakna pawh neih a ni bawk.

Ruihhlo tawlh ṭhin do hna thawhna kawngah India chuan ram hrang hrangte thawhpuina tur, bilateral agreement 26, memorandum of understanding 15 leh agreements on security cooperation a ziahpui tawh tih MHA chuan a sawi.