Delhi Police-ten Congress MP 75 an hreng

Enforcement Directorate (ED) in nimina National Herald case-ah Congress interim president Sonia Gandhi thu an zawhfiah avanga lungawi lohna lantirtu, Congress MP 75 leh party worker dang eng emaw zat chu Delhi police-ten an hreng.

Police-ten an hren zingah hian Rajya Sabha-a leader of opposition Mallikarjun Kharge bakah party hruaitu - P Chidambaram, Ajay Maken, Manickam Tagore, KC Venugopal, Adhir Ranjan Chaudhry, Shashi Tharoor, Sachin Pilot, Harish Rawat, Ashok Gehlot leh K Suresh-te pawh an tel.

Sonia Gandhi hi ED office-ah thu zawhfiah a ni a, a fanu Priyanka Gandhi Vadra leh a fapa Rahul Gandhi-ten an zui a ni.

Party hruaitu Jairam Ramesh chuan politics thila phuba lakna atana hman tuma Congress president Sonia Gandhi bitum a nih chungchangah lungawi lohna leh, Sonia Gandhi an thlawpna lantira Delhi-a party headquarters-a pungkhawmte chu police-te hian an la vek niin a sawi.

Mallikarjun Kharge chuan rorellai BJP chuan central agency-te chu hmang sualin, politics lama an khingpui, eptu hruaitute an bitum tir a ni, a ti. "Rorellai party hian thil an tihtheihzia hi lantir an duh a ni. Parliament-ah ram chhunga thil man sang zel chungchang kan sawichhuah pawhin sawiho an duh lo. Tunah central agency-te hman sual an nih dan hi kan sawichhuak leh duh a ni," a ti.

Rajasthan chief minister Ashok Gehlot pawhin ED official-te chet dan chu demin, Sonia Gandhi chu kum 70 chuang a ni tawh a, thu an zawtfiah duh a nih pawhin a inah an kal mai tur a ni tiin a sawi. Gehlot chuan, "ED leh CBI hotute hi hmuh a, ram mipuiten central agency an hmuh dan hi hrilh ngei ka duh a ni," tiin a sawi.

Sachin Pilot chuan ram chhungah central agency-te dik lo taka hman ṭangkaina a thleng mek. Democracy ramah hetianga thil dik lo tih an duh lohzia lantir turin dikna an nei tih a sawi a, mahse chutianga lantirtute chu nek beh an ni leh si a ni, a ti.