India President thar tur Draupadi Murmu

India President thar atan Draupadi Murmu chu hneh taka thlan tlin a ni. Tribal hmeichhiate zinga India President ni thei hmasa ber a ni ang.

President ṭanglai, Ram Nath Kovind-a term chu Juy 24 hian a tawp dawn a, July 25-ah Murmu-i hi India President 15-na atan rinawmna thu tiamtira lakluh a ni ang.

July 18-a India President thar tur thlannaah hian vote thlak thei MP 771 leh MLA 4,025 , an vaiin 4,795 an awm a, an zinga 99% in vote an thlak. Nimin khan vote tla te hi chhiarin, MP-te vote chhiar hmasak a ni. Rorellai, BJP kaihhruai National Democratic Alliance (NDA) candidate Murmu-i hian Parliament member vote 540 hmuin, a vote hmuh hlut zawng hi 3,78,000 a ni. Eptu party joint candidate, union minister hlui Yaswant Sinha chuan MP vote 208 hmuin, a vote hmuh hlut zawng hi 1,45,000 a ni.

He chanchin buatsaih thleng hian MLA-te vote hi round 2-na chhiar a ni tawh. Murmu-i hian vote chhiar tawh chinah MLA vote 1,349 hmuin, Sinha hian vote 537 a hmu. Vote tla chhiar tawh aṭangin NDA candidate hian vote 71.79% a hmu tling tawh a ni.

Kum 64 mi, Jharkhand governor hlui Draupadi Murmu hi tribal zinga President ni hmasa ber tur leh, Pratiba Patil dawta hmeichhe zinga he dinhmun luah leh thei hmasa ber a ni ang.