Environment Ministry-in talh tura bawng zawrh a khap

Environment Ministry chuan ram pumah bawng talh a khap a, talh tur atana bawng zawrh khapna dan a siam bawk.

Ministry of Environment, Forests and Climate Change-in Prevention of Cruelty to Animals (Regulation of Livestock Markets) Rules, 2017 a tihchhuahah, talh tura bazar bawng zawrh khap a nih thu a tarlang a, a zuartu chuan talh turin a hralh dawn lo tih intiamna thuziak pawh a siam a ngai tawh dawn a ni. Bawng zawrhte chu talh tur ni loin, loneituten an leileta an chhawr tur atan chauha hman a ni tih animal market commitee pawhin an enfiah bawk ang.

Animal market-a official-te chuan bawng leitu chuan loneitu a ni ngei em tih revenue document aṭangin an enfiah ang. Ministry thuchhuah chuan bawng leitu chuan talh tur ringawta lei tur a ni loa, sakhaw thila inhlanna tur thil atan pawh a hmang tur a ni lo, a ti.

Dan thar siamah hian phalna nei loin state pawn lam mi hnenah bawng hralh khap a ni a, ran zawrh­na hmun chu state ramri aṭanga km 25 bial chhungah siam khap a ni bawk.

Hetihlai hian kumin January thla khan Supreme Court chuan ram puma bawng talh khap duh chungchanga PIL thehluh a ngaihtuahnaah, he thil hi state subject a nih thu a sawi. Surpeme Court chuan state ṭhenkhatin bawng talh hi an khap thei a, a ṭhenin an khap duh lo thei a, inrawlh a tum loh thu a sawi a ni. Ram puma ang khata bawng talh khapna policy siam tura ngenna chu a lo hnawl tawh a ni.