Khaw 900-ah MODI Fest nei ṭan

Prime Minister Narendra Modi-a kaihhruai NDA sorkar­in kum thum a tlin champha puala Making Of Developed India (MODI) Fest buatsaih chu nimin khan ramchhunga khaw 900-ah neih ṭan a ni.

PM Modi chuan nimin khan MODI Fest hi Assam-ah a hawng a, hemi rual hian khaw hrang hrangah neih nghal a ni. BJP sorkarna state chief minister hrang hrangte chuan an state khawpuia MODI Fest hmanna hi an hmanpui a ni.

Khawpui 900-ah MODI Fest hi nimin aṭanga June 15 chhung hian neih a ni dawn a, festival chhung hian sorkar laipuiin hlawhtlinna a hmuh hrang hrangte pholan a ni ang a, hmasawnna tura a hmachhawpte pawh tarlan a ni bawk ang.

Festival hi state sorkar huai­hawt tur a ni a, festival chhung hian sorkar policy pawi­mawh hrang hrang te, a hnathawh tawh dan te, welfare scheme a siam chungchang ziahna lehkha chu sem darh a ni dawn bawk a ni.