Sorkar thupek dodal nan bawngsa festival buatsaih

Sorkar laipuiin talh tura bawng zawrh leh hralh khapna a siam duh lohna lantirin, nimin khan Kerala state chhung hmun hrang hrangah bawngsa festival buatsaih a ni.

Rorellai, CPI (M) kaihhruai LDF, eptu pawl Congress kaihhruai UDF activist leh youth wing-te chuan kawng zawhin bawngsa festival hi an siam a ni. Bawngsa festival huaihawt hi tlawhtu pawh anṭhahnem hle.

Sorkar laipuiin talh tura bawng lam chi hralh leh lei a khap hian sa leh savun thawnchhuahn lamah pawh nghawng a neih len hle rin a ni.

Kerala-a nawrh huaihawttu, DYFI national president Mohammed Riyaz chuan sorkar thupek an duh loh zia lantir nan khawlaiah bawngsa siamin an ei tih a sawi. Kollam district-ah pawh Congress worker-te’n DCC office kawtah bawngsa an siam bawk. District unit hotu, Bindu Krishna chuan bawngsa chu pack-in, Prime Minister Narendra Modi-a thawn turin post office-ah an dah thu a sawi.

Kerala Chief Minister Pinarayi Vijayan chuan Prime Minister hnenah lehkha a thawn tur thu a sawi bawk.

Congress hruaitu leh union minister hlui AK Antony chuan, bawng hralh khap chungchanga sorkar thupek tihchhuah chu pawhchhiat vek a, bawhhlawh bawmah paih tlak a ni, a ti. UDF hian vawiin hian state pumah ‘black day’ an hmang dawn bawk a ni.

Hetih lai hian Maharashtra-a Washim district-ah bawng humhalhtu pawl intite chuan bawngsa kawlah puhin mi pahnih an sawisa. An sawisa lai video hi social media lamah thehdarh a ni bawk. Washim district SP, Moshanda Patil chuan he thil thleng kaihhnawihah hian mi pakua man an ni a, an zingah hian bawngsa kawla puh mi pahnihte pawh man tel an ni bawk tih a sawi. An vai hian IPC section hrang hrang hnuaiah thubuai siamsak nghal an ni.