Gujarat-ah Zika virus vei mi pathum hmuchhuak

Gujarat state-ah thosi seh aṭanga kaichhawn theih, Zika virus vei mi pathum hmuhchhuah an ni. He thil vang hian sorkar chuan mipuite chu chiai lo turin a chah nghal bawk.

Indian Council of Medical Research chuan Zika hri vei mi pathumte hi Ahmedabad-ah hmuh an ni a, mahse tunah chuan an ṭha tawh niin a sawi.

Zika virus hi kum 2015 khan Brazil-ah hmuhchhuah a ni a, ram 60 chuangah a darh tawh a, Caribbean ramte chuan an tuar nasa ber a ni. South leh Central America ramah pawh a vei eng emaw zat hmuhchhuah an ni tawh bawk. Zika virus hi nu naupai laiin a vei chuan a naute chu pianphunga rualban lo, mi pangngai aia lu leh thluak tein a piang thei a ni. Bengngawnna leh mitdelna thlengin a thlen thei bawk.

Gujarat-a Zika virus vei hmuh zinga pahnih hi naupai lai an ni. Zika virus veite hi nikum November thla leh kumin February thlaa hmuhchhuah an ni a, mahse WHO chuan kar kalta Zirtawpni khan a nemnghet chauh a ni.

Indian Council of Medical Research (ICMR)-a Director Gene­ral Dr Soumya Swa­minathan chuan mi pathumte hi ram pawn lamah an zinchhuak lo a, tualchhung aṭanga an kai nia a lan thu a sawi. Mahse hei vang hian chiai phahna tur a awm lo a ni, a ti.

Health ministry official-te chuan state tinte chuan Zika virus darh tur venna atana inkaihhruai­na te an zawm ṭha hle tih a sawi. Sorkar laipui chuan inkaihhruaina leh hma lak dan turte chu state tin hnenah a lo hriat­tir tawh a ni.

Zika virus hi thosi chi khat, Aedes aegypti seh aṭanga kai theih a ni a, he thosi vek hi dengue, chikungunya leh yellow fever-te thlen theitu a ni. He virus hi a vei lai nena sex hman aṭangin a kai theih bawk. Zika virus hi a damdawi ala awm lo a, company leh scientist-te chuan vaccine siam tumin an la bei mek zel a ni. Zika vei lanchhuah dan chu khawsik, vun thak, tha leh ruh chuktuah na bakah chauh ngawih ngawihna te a thlen a, hetiang hian ni hnih aṭanga kar khat chhungte an awm ṭhin a ni.