Ram pali tlawh turin PM a zinchhuak

Prime Minister Narendra Modi chu ram pali tlawh turin nimin khan a zinchhuak.

PM Modi hian nikhan Germany a pan a, Berlin bul Meseberg a tlawh ang. A cham chhung hian German Chancellor Angela Merkel kawmin, ram pahnihte inlaichinna chungchang a sawipui dawn a ni.

May 30-ah PM Modi leh Merkel-te hian India-Germany Intergovernmental Consultations (IGC) an nei dawn a, ram pahniha sumdawng hruaitute kawmin trade and investment lama thawhdunna nghet zawk neih dante an sawiho dawn a ni. PM hian Germany President Dr Frank-Walter Steinmeier pawh a kawm bawk ang.

Modi hian Germany aṭangin Spain a pan dawn a, hei hi India prime minister-in kum sawmthum chhunga Spain a tlawhna hmasa ber tur a ni. Spain-a a awm chhung hian spain Lal King Felipe VI a hmu dawn a, President Mariano Rajoy nen meeting an nei dawn bawk a ni. Modi hian Spainish industry-a CEO te hmuin, a kaihhruai sorkar hmalakna, “Make in India’ kalpui mekah thawhpui turin a sawm dawn a ni.

May 31 - June 2 inkarah PM hian Russia a tlawh dawn a, St. Peterburg-a 18th India-Russia Annual Summit neih tur a hmanpui dawn a ni. Modi hian Piskarovskoye Ce­me­tery a tlawh bawk ang. June 1-ah PM Modi hian Russia President Vladimir Putin kawm­in, kum 2016-a Goa-a summit an neih ṭuma an thil sawi dun tawhte a sawipui leh dawn a ni. Putin nen hian industry CEO-te an kawm dawn bawk a, June 2-ah St. Peters­burg International Economic Forum (SPIEF) an hmanpui dawn a ni.

June 2-ah France panin, France president Emmanuel Macron chu ram pahnihte inzawmna leh thawhdunna tihngheh dante a sawipui bawk ang.