Bawng talh khap vangin Kerala-in all party meeting ko dawn

Kerala state sorkar chuan sorkar laipuiin talh tura bawng zawrh khapna dan a siam do letna tur dan hran siam a tum. Hemi chungchang ngaihtuah hian all party meeting koh thuai a tum.

Kerala Chief Minister Pinarayi Vijayan chuan Prime Minister Narendra Modi chu lehkha thawnin, sorkar laipui thupek tihchhuah chu an duh loh thu pawh a lo hrilh tawh a ni. Vijayan chuan BJP kaihhruai NDA sorkar leh RSS chu na taka sawiselin, an state mipuite chuan an ei tur chungchangah central lama mite thurawn an lak kher a ngai lo tih a sawi.

Agriculture Minister VS Sunilkumar chuan all party meeting neih hun tur hi Nilaini-ah puan a ni dawn tih a sawi. ‘Sorkarin khapna thupek a siam hian state chhunga mi tam tak eizawnna a nghawng dawn a ni. Cabinet meeting-ah pawh kan ngaihtuah dawn a, Kerala hian sorkar laipui dan siam do letna tur dan thar a siam a nih pawhin mak lo ti lo ang che u”, a ti.

Sorkar laipuiin bawng talh khapna a siam duh lohna lantirin Pathianni khan Kerala-a rorellai leh eptu pawl hrang hrangte chuan state chhungah bawngsa festival an siam a, chhimtu pawh an ṭhahnem hle. Pathianni zanah khan Indian Institute of Technology (IIT) Madras-ah zirlai ṭhenkhatten beef festival hi an buatsaih bawk. May 27 khan Students’ Federation of India (SFI) chuan sorkar laipui thupek dodalna lantir nan University College, Trivandrum pawn lamah a huhoin bawngsa an lo ei tawh bawk a ni.