Bawng talh khapna dan dodaltu an pung ; Kerala High Court-ah petition thehlut
Sorkar laipuiin talh tura bawng zawrh leh lei a khapna chu state hrang hrangah dodaltu an pung zel a, he dan hi hlip tura phutin Kerala High Court-ah petition pahnih thehluh a ni bawk.
Bawng talh khapna dan siam duh lohna lantirin Kerala state hmun hrang hrangah bawngsa festival pawh buatsaih a lo ni tawh a, Chief Minister Pinarayi Vijayan chuan state hrang hrang chief minister-te lehkha thawnin, he thupek thar hi zawm lo turin a ngen a, Prime Minister Narendra Modi hnenah pawh bawng talh khapan dan siamthar chu kalpui lo turin a ngen bawk. Kerala sorkar hian bawng talh khapna do letna dan hran siam a tum a ni.
Kerala High Court-ah pawh petition thehluh a ni a, sorkar thupek tihchhuah thar hi Prevention of Cruelty to Animals Act, 1960 kalh a ni tiin sut tura ngen a ni. Court chuan bawng talh khapna tihchhuah anih chungchangah sorkar laipui chu insawifiah turin a ti a ni.
West Bengal Chief Minister Mamata Banerjee-i pawhin sorkar thutlukna chu ram danpui kalh a ni tiin, an pawm dawn loh thu a sawi. Hetiang a nih chuan ei tura chin thlaite pawh lak khap a ngai mai dawn niin a sawi a, sorkar laipuiin bawng talh khapna a siam chu state thuneihna chungah inrawlh tumnaah a puh bawk.
Karnataka Agriculture Minister Krishna Byre Gowda chuan sorkar dan thar hian loneitute a nghawng na ber dawn tih sawiin, bawngte chu talh tura hralh phal a nih tawh loh chuan loneitute tan enkawl a hautak tawh hle dawn a ni, a ti. State sorkar chuan sorkar laipui dan siam chu an ennawn ang a, hma lak dan tur an ngaihtuah tur thu a sawi.
Bawng talh khapna dan thar, Prevention of Cruelty to Animals (Regulation of Livestock Market) Rules, 2017, hi May 23 khan Environment Ministry chuan a tichhuak a, he dan thar hnuaiah hian bawng leh bawng lam chi, sial, lawi leh camel-te chu animal market-ah talh tura zawrh leh lei khap a ni. Heng ransate hi thlai chinna hmun leh leiletnaah chhawr tur chauh lei phal a ni.
Sorkar thupek tihchhuah thar hian sa talhtu, sa zuarte leh loneitute thleng pawhin a nghawng hle. Mi tam tak eizawnna a tih-chhiat phah a ni.
State hrang hrangten bawng talh khapna dan thar tih-chhuah thar hi sawisel a, an dodal avang-in Environment ministry chuan la ngaihtuah ṭha leh maithei nia sawi a ni. Senior official chuan ngaihdan hrang hrangte an dawng mek tih a sawi a, ngaihdante hi lakkhawm a nih hnuah an ngaihtuah ṭha leh dawn niin a sawi. Thutawp erawh chu Prime Minister kut-ah a awm dawn niin a sawi.
Hindu sakhaw zuitute chuan bawng hi ransa thianghlimah ngaiin an serh a, hei vang hian kum 2014-a BJP kaihhruai NDA sorkar a din aṭang khan bawng humhalh leh bawngsa khap chungchang hian buaipui a hlawh chho hle. BJP thawhpui pawimawh, Rashtriya Swayamsevak Sangh (RSS) chuan ram pumah bawng talh leh a sa zawrh khap turin sorkar an nawr reng bawk. Hetihlai hian sakhaw dang zuitute chuan bawngsa khap hi midangte an ei duhzawnga thlang tura zalenna an neihte rahbeh sakna nia ngaiin an dodal a ni.
Sorkar laipuiin bawng humhalh tuma hma a lak chhoh zel avangin ramchhung hmun tam takah bawng humhalhtu intiten bawngsa ei leh kawla puhte chungah kut an thlak fo a, thihna hial pawh a thleng a ni.