July 25-ah President thar Murmu-i lalut dawn

India President thar atana thlan tlin tak, Droupadi Murmu-i chu June 25, Thawhṭanni hian rinawmna thu tiamtirin lakluh a ni dawn.

Tribal zingah India President ni thei hmasa ber tur leh, hmeichhiate zinga President ni thei pahnihna tur, kum 64 mi Murmu-i hian Thawhṭannia President thlanna neihah hian vote tla aṭangin 64.03% a hmu a ni. India Pesident atana thlan zingah vote share hmu tlem ber dawt a ni a, kum 1969-a President atana thlanVV Giri kha vote hmu tlem ber niin, 48.01% chauh a hmu pha a ni.

Murmu-i hian vote 2,824 hmuin, a vote hmuh hlut zawng hi 6,76,803 a tling. Inthlana tling tur hian vote an hmuh hlut lam hi 5,43,000 a tlin a ngai a ni. A khingpui, eptu pawl joint candidate Yaswant Sinha chuan vote 1,877 hmuin a vote hmuh hlut zawng hi 3,80,177 a ni.

Droupadi Murmu
India President 15-na tur, Droupadi Murmu hi Santhal tribal hnam niin, kum 1958 June 20-ah Odisha-ah a piang. A pa Biranchi Narayan Tudu chu loneitu a ni.

Bhubaneswar-a Ramadevi Women's College aṭangin a graduate a, Shri Aurobindo Integral Education and Research, Rairangpur-ah honourary asssitant professor hna athawk. A hnuah Odisha irrigation department-ah junior assistant atan lak niin, kum 1979-1983 thleng a thawk.

Murmu hian a pasal Shyam Charan Murmu nen fapa pahnih leh fanu pakhat a nei a, mahse a pasal leh a fapate pahnihte hi a sun tawh a ni. Kum 1983-ah sorkar hna bansanin, a fate a enkawl.

Kum 1997-ah politics lamah lutin, BJP a zawm. Hemi kum hian Odisha-a Rairangpur district councillor atan thlan a ni. Kum 2000-ah Rairangpui MLA-ah thlan tlin a ni a, Odisha-a Biju Janata Dal sorkar, BJP-in a thlawpah minister niin, transport and commerce and animal husbandry department a enkawl.

Kum 2002 khan Murmu hi BJP ST Morch-a national executive member atan ruat a ni a, kum 2004-ah MLA-ah thlan nawn leh a ni. Kum 2005 khan Odisha-a ST Morcha state president atan ruat a ni leh.

Murmu hi kum 2007 khan MLA ṭha berah thlan niin, 'Nilakantha Award' hlan a ni.

Kum 2010-ah Mayurbhanj (west)-ah BJP district president-ah ruat a ni a, kum 2013-ah thlan nawn leh a ni. Kum 2015 khan Jharkhand governor-ah ruat niin, kum 2021 thleng a awm.

President thar atana thlan hian kum 2016 khan a thih hnuah a mit (eye) chu Ranchi-a Kashyap Memorial Eye Hospital-ah a donate dawn tih a lo puang tawh a ni.

India President dinhmun
• India President official residence chu Rashtrapati Bhavan a ni a, room 340 a awm. Floor area hi square feet 2,00,000 zeta zau a ni.
• India President hian thla khatah Rs nuai 1.5 a hlawh ṭhin a, mahse kum 2016-ah hlawh hi 200%-a tipungin Rs nuai 5 a hlawh tawh a ni.
• President hian chenna leh damdawi lam enkawlna a thlawnin a dawng vek a, hei bakah hian kum khatah a office expenditure atan Rs nuai khat a dawng bawk.
• President hian chawlh hmanna turin official retreat pahnih a nei. Pakhat chu Shimla-a Mashobra niin, pakhat dang chu Hyderabad-a Bolarum a ni.
• President hi khawvel ram hrang hrangah rel leh thlawhtheihnain a thlawnin a zin thei.
• President hian custom-built Black Mercedes Benz S600 (W221) Pullman Guard a dawng a, limousine chu official visit a neih atana ruahman a ni ṭhin bawk.
• India President car kawl ho hi security lam venthawn thil avangin puanzar a ni ngai lo. A car kawlte hian license plate an nei lo a, national symbol dah an ni zawk ṭhin.
• An chawlh hnuah pension, thla khatah Rs nuai 1.5 leh hamṭhatna eng emaw zat an la zui bawk. Heng zingah hian a thlawnin bungalow a luah thei a, landline leh mobile phone a thlawn vekin a hmang thei a, personal staff panga bakah staff chhawrna turin kum khatah Rs 60,000 a dawng ṭhin bawk.