Delhi-ah Monkeypox kai 1 hmuh belh ; DGHS-in high level review meeting a ko

Khawvel ram hrang hranga hri darh mek, monkeypox hri kai pakhat chu Delhi-ah hmuh chhuah leh a ni a, India ramah he hri kai pali hmuh an ni tawh. Hri kai pathum hmuh tawhte chu Kerala state ami vek an ni.

West Delhi-a cheng, monkeypox kai hmuh hi kum 31 mi, ram pawn lama zin chhuahna nei lo a ni a, mahse tun hnaiah Himachal Pradesh-a Manali-a party-naah a kal niin official-te chuan an sawi. Hri kai hmuh belh a nih avang hian nimin tlai dar 3 khan Directorate General of Health Services (DGHS)-a high-level review meeting an nei nghal bawk. Hri kai hmuh thar hi a hma ni thum liam taah symptom a neih avangin damdawi-inah dah a ni a, a sample hi Pune-a National Istitute of Virology (NIV)-ah thawn a ni a, Inrinni khan monkeypox a ni tih finfiah a ni.

Delhi chief minister Arvind Kejriwal chuan khawpui chhungah hri kai hmuh a nih thu a sawichiang ve nghal bawk a, mahse mipuite tan chiaina tur a awm lo tih a sawi. "Delhi-ah monkeypox kai hmuh a ni a, mahse dam lo hi a ngaihtuahawm lo a, midangte tan lo chiaina tur a awm lo. LNJP-ah isolation ward siam a ni. He hri hi a darh lohna turin kan team neih ṭha berte chuan theihtawp an chhuah nghal a ni," a ti.

Kerala-a monkeypox kai pathum hmuh tawhte hi ram pawn lama zin chhuahna nei vek an ni thung. Pakhat hi UAE aṭanga rawn haw niin, mi dang pahnihte chu Dubai aṭanga rawn haw an ni. India rama monkeypox kai hmasa ber hi July 14 khan hmuh chhuah a ni a, Thiruvananthapuram-a Government Medical College Hospital-ah enkawl mek a la ni.

Ram chhungah monkeypox hri enfiahna tur laboratory 16 a awm a, heng zinga pahnih chu Kerala state ami a ni.