Tri-service joint theatre command din dawn : Rajnath Singh

Defence minister Rajnath Singh chuan armed force-ten thawhhona ṭha leh zau zawk an neihna turin service pathumte tan joint theatre command din a ni dawn tih a sawi.

Rajnath Singh chuan India ram chu khawvela defence lam hmanrua laluttu ram lian ber aṭangin a thawnchhuaktu lian ber ni turin hma a sawn zel tih a sawi bawk.

Jammu Kashmir People's Forum-in nimina India Armed Force-a martar-te zahna hlanna hun an buatsaihah Defence Minister chuan he thu hi a sawi a ni. "Kargil-a joint operation, Operation Vijay neih takte kha thlirin, joint theatre command din hi kan rel a ni," a ti.

Kargil martarte zahna hlanin, Rajnath Singh chuan ram venhimna tura an inpekna chu engtikah mah theihnghilh a ni dawn lo tih a sawi a, "Khawtlang leh mipuite pawhin martar leh an chhungte kan zahna sang ber kan lantir tur a ni. Kan thlawp leh puih theih dan angin an chhungte kan pui zel tur a ni a, hei hi ram mipui tinte mawhphurhna a ni, " tiin a sawi.

Khawvela defence hmanrua laluttu lian ber ram ni ṭhin, India chu tunah chuan ram dang aṭanga hmanrua lalut nasa ber ni tawh loin, defence hmanrua thawnchhuak tam ram 25 zingah a tel tawh a ni, tiin Minister chuan a sawi. Defence hmanrua a thawnchhuah hi Rs vbc 13,000 hu vel a ni a, hei hi kum 2025-26 ah chuan Rs vbc 35,000 - 40,000 velah tihpun tum a ni tih a sawi bawk.

Rajnath Singh hian thla khat chuang awrh chhunga Jammu a tlawh ṭum hnihna a ni. June 17 khan a lo tlawh tawh bawk a ni.