Congress-in PM leh BJP President-te thupha chawi turin phut

Congress party chuan BJP thupuangtu Prem Shukla-a'n Sonia Gandhi chungchang a sawinaa ṭawngkam dengkhawng leh mawi lo tak a hman avangin prime minister Narendra Modi leh BJP president JP Nadda-te chu thupha chawi turin an phut.

BJP president JP Nadda hnenah lehkha thawnin, Congress general secretary Jairam Ramesh chuan July 23-a national news channel-a Shukla-a'n Gandhi chungchang a sawinaa a ṭawngkam hman chu dengkawng leh zahawm lo tak a ni tiin, an lungawi lo hle tih an sawi.

BJP hruaitu lu leh thupuangte hian hmeichhhiate chungchang an sawihnaah, a bikin kum 75 mi national party president chungchanga an sawinaah hian ṭawngkam mawi lo tak an hmang fo a ni, a ti.

"Eptu hruaitute chungchanga ṭawngkam ngeiawm tak tak hmang ṭhin hian BJP-in hmeichhiate an dah pawimawh loh zia a tilang a ni. Hetianga an tih ṭhin avang hian ram chhunga politics level pawh a tlahniam a ni," tiin Ramesh chuan a sawi.

Vedic hun lai aṭangin India ramah hmeichhiate zahna lantir chu tihdan phung a ni reng a, hei vang hian rorellai BJP pawh hmeichhiate lakah zahna an lantir ve pawh kan beisei a ni. Mahse he party hian an ṭawngkam leh chetzia aṭangin min ti hnual ta fo mai, tiin Nadda hnenah lehkha a thawnah a tarlang.

Prime Minister Modi leh Nadda-te chu an party hruaitute thiltih dan mawi lo tak avangin ram chhunga hmeichhiate lakah thupha chawi turin an phut a, hei bakah hian party spokesperson leh hruaitute chu politics zahawmna tichhe thei zawnga che lo tur leh, ṭawngkam mawi lo tak tak hmang lo tura ngen turin Congress chuan a phut tih Ramesh chuan a sawi a ni.