Karnataka CM-in sorkar laipui thupek zawm vek a tum lo

Karnataka Chief Minister Siddaramaiah chuan sorkar laipuiin talh tura bawng zawrh khapna thupek a siam thar chu sawisel ve lehin, sorkar laipui aṭanga hriattirna tihchhuahte chu zawm vek kher tur a ni lo, a ti.

CM Siddaramaiah chuan bawng talh khap chungchanga sorkar laipui thupek chu zawm vek a ngai lo a, hei chu state sorkar te ngaihtuah tur zawk a ni, a ti. A kaihhruai sorkar chuan bawng talh khap chungchang hi ngaihtuahin, sorkar laipui hnenah a chhanna pawh a pe dawn tih a sawi bawk.

Kerala Chief Minister Pinarayi Vijaya chuan talh tura bawng zawrh khap a nih chungchangah state hrang hrang chief minister-te chu an aw chhuah vek turin a ngen a, sorkar laipui thiltih dan chu democracy kalphung a ni lo tiin, Central Act hmanga state sorkarte thuneihna hreksak a tumna a ni, a ti. Vijayan hian bawng zawrh chung­changa khuahkhirhna siam chuan mi tam tak eizawnna a khawih dawn tih sawiin, a bikin agricultur sector hnuaia eizawngten an tuar nasa dawn hlen niin a sawi.

West Bengal Chief Minister Mamata Banerjee-i pawhin bawng hralh khap chungchanga sorkar laipui thupek chu state sorkarin thupek a tihchhuah ve leh hma chuan zawm a ngai lo tih a sawi. Hemi rual hian state police-te chuan state ramri, North 24-Parganas kaltlanga bawng tawlhruk ṭhinte veng tura theihtawp chhuah turin a ti.

Banerjee-i chuan an state chu sakhaw tin zalenna a ni a, Muslim-te’n an thla serh Ramazan an hmang mek a, hetiang bawk hian sakhaw dangte pawhin an hun pawimawh lawmin hun an hmang a, sakhaw tinin dikna an nei a ni, a ti. Miin a thil ei tur chungchangah duh­thlanna a nei a, midangin engmah an sawi sakin an thunun thei lo, a ti. Bawng talh khap chungchangah state sorkarin eng thupek mah a tichhuak lo a, hei vang hian state mipuite chu sorkar laipui thupek zawm lo turin a chah.