PM-in bullet train project lungphum phum dawn

Prime Minister Narendra Modi chuan September thla hian ram chhunga a hmasa ber tur, bullet train project lungphum a phum dawn a, he project hi Mumbai-Ahmedabad-ah thawh a ni ang.

Japan Prime Minister Shinzo Abe-a’n September thlaa India ram a rawn tlawh hunah, PM Modi nen bullet train project luhgphum hi an phum dawn niin, Railway Board member Mohad Jamshed chuan a sawi. Project hi kum 2022-ah zawhfel hman tum a nih thu a sawi bawk.

Bullet train tlan tir tur hi darkar khata km 320-a chaka tlan tur a ni a, khawvel huapa rel chak chi ho el pha tura duan a ni. He project hi zawhfel a nih hunah chuan Indian Railways tana hmasawnna ropui tak a nih tur thu a sawi. India ramah hian relkawng km 66,000 chuanga thui awmin, nitin khualzin maktaduai 24 vel an awm a, kum khat chhungin ramdang mi khualzin maktaduai kua velin an chawr ve bawk.