UP-a anti-Romeo squad-te’n thubuai 500 chuang ziaklut tawh

Uttar Pradesh sorkarin khawlaia hmeichhiaten chhaih leh zui an tawh ṭhin vengtu tura a din, anti-Romeo squad-te chuan thla hnih chhungin thubuai 500 chuang an ziak lut tawh.

Official-te’n an tarlan danin, thla hnih chhung hian thubuai 538 ziahluh a ni a, mi 1,264-te chungah action lak a ni tawh. March 22 leh May 28 inkar khan squad-te hian punkhawmna hmun hrang hrang, mall, market, school, college leh zirna-in bul, bus leh rel station-ah mi nuai sarih vel thu an zawtfiah hman a, ṭhalai 3,38,344 chu warning pek an ni bawk.

UP-a BJP sorkar chuan inthlan dawna alo tiam tawh angin anti-Romeo squad hi a din a, hetihlai hian squad-te chetdanah sawiseltu tam tak an awm bawk. Squad-te hian mipa ṭhalai awmkhawmte chu an vaihma tawp nia puhtu pawh an awm a, an zinga tam tak chu vantlang punkhawmna hmunahte zilhin, beng pawtin an suktir ṭhin nia sawi a ni.

Squad-te chetdanah sawi­selna tam tak a awm hnuin, state sorkar chuan polcie leh anti-Romeo squad-te tan inkaihhruaina khauh zawk a tichhuak a, pawisawilote bitum tel lo tur te, sam meh sak leh hmaih hnawih dum sakahte mi vau lo turtein a hriattir a ni.