ACB-in Delhi sorkar damdawi lei dan chhui dawn

Anti-Corruption Bureau (ACB) chuan Delhi sorkar-in damdawi a lei danah thil dik tawk lo a awm nia sawi chu a chhuichiang dawn.

ACB team hian Delhi-a hmun hrang hrang an dap nghal a ni.

Delhi-a rorellai, Aam Aadmi Party (AAP) MLA hel Kapil Mishra chuan Delhi Chief Minister Arvind Kejriwal leh Health Minister Satyendra Jain-te chu eiruknaa inhnamhnawihah puhin, health department fund-te dik lo taka hmangah a puh. Hemi hnu hian health department sum hman dan hi CB hian a chhui chiang dawn ta a ni.

Mishra chuan Health department hian damdawi hman duh lo leina atan cheng vaibelchhe 300 zet a seng a, he thilah hian health minister Satyendra Jain pawh a inrawlh niin sawi. Hei bakah hian automobile company-te’n ambulance pakhat cheng nuai 11 zela an supply theih laiin, health department hian ambulance 100 chu pakhat cheng nuai 23 zelin a lei a ni, a ti. Minister Jain hi dan kalha doctor transfer leh posting chungchangah a inrawlh niin a sawi bawk.

Kapil Mishra chuan Delhi sorkar chuan sorkar hospital hrang hrangah damlote tan a thlawna damdawi pek a tiam a, mahse damdawi hi a taka pekchhuah a awm lo niin a sawi. Delhi sorkar chuan a puhna hi thu dik lo niin a sawi thung a, hospital-ah hian damdawi 80% vel chu hmuh tur a awm reng a ni, a ti.