Vantlang hmuha bawng talhtu Kerala Congress hruaitute man

Sorkar laipuiin bawng talh khapna thupek a siam thar duh lohna lantira vantlang hmuha bawng talh a, a sa semtu Kerala Congress Youth Wing hruaitu pariatte chu man an ni.

Congress Youth Wing hruaitute hian bawng talh khapna thupek dodalna lantir nan hian thla 18-a upa bawng chu Kannur khuaah mipui hmuh laiin an talh a, an thiltih hian sawisel a hlawh hle a, Congress vice president Rahul Gandhi pawhin an chetdan a dem thu hi alo sawi tawh a, party aṭangin suspend an ni tawh bawk.

Bawng an talh lai video hi Kerala BJP president Kummanam Rajasekharan chuan thehdarhin, an chetdan chu a nunrawn thlak hle a, mi pangngaiin an tih duh loh tur thil a nih thu a sawi. He thil thleng vang hian Yuva Morcha district General Secretary CC Ratheesh chuan police-ah complaint a thehlut a, police-te chuan Youth Congress worker Rujil Makulti leh midang pasarihte chu Kerala Police Act section 120 A hnuaiah thubuai an siamsak zui ta a ni.

BJP sorkarna ni lo state chief minister-te chuan bawng talh khap chungchangah sorkar laipui thupek dodalna lantirin, Kerala state chhung hmun hrang hrangah chuan a dodalna lantir na bawngsa festival pawh huaihawt a ni. Karnataka leh West Bengal chief minister-te chuan sorkar laipui thupek hi zawm an tum loh thu an sawi tawh bawk. Nilaini khan Tamil Nadu-ah pawh lungawi lohna lantir a ni a, DMK president MK Stalin hoin Chennai-ah sorkar thupek duh lohna hi lantir a in a, ‘Beef Fest’ buatsaihtu IIT-Madra-a Ph.D tilaiin beih a atawk chu an dem thu an sawi bawk. Lungawi lohna lantirtute hian nawrh an huaihawtna hmunah hian bawngsa an ei bawk a ni.