Kerala Assembly-ah Bawng talh khapna dan sawiho dawn

Kerala cabinet chuan sorkar laipuiin talh tura bawng zawrh leh lei khapna dan thar a siam chu sawiho a nih theih nan Governor P.Sathasivam hnenah June 8-a special assembly session neih a dil.

Nimin zing khan Chief Minister Pinarayi Vijayan hoin cabinet meeting neih a ni a, meeting-ah hian special session neih hi rel a ni.

Sorkar laipuiin bawng talh khapna dan thar a siam chungchang chu Kerala sorkar hian na takin a dodal a, dan thar siam duh lohna lantir hian state chhung hmun hrang hrangah bawngsa festival buatsaih a ni a, CM chuan Prime Minister Narendra Modi lehkha thawnin he dan hi sut leh turin alo ngen tawh bawk a ni. Bawng talh khapna dan dodal kawngah hian eptu party-te pawhin state sorkar hi an thlawp a ni.

Vijayan chuan state dang chief minister-te pawh lehkha thawnin, sorkar laipui dan tihchhuah thar chu zawm lo turin a ngen. June 6-7 hian Delhi-ah Communist Party of India-Marxist (CPI-M) meeting chhim turin a kal dawn a, hemi denchhen hian June 5-ah bawng talh khapna dan chungchangah state hrang hrang CM-te chu meeting neihpui a tum bawk.

June 8-a special session neih hunah hian sorkar laipuiin bawng talh khapna dan a siam duhlohna resolution pawh an pass ngei rin a ni a, hei bakah hian an state tan bik dan hran an siam rin a ni bawk. Resolution an siam tur hi Assembly member-te’n an pawm tlan rin a ni a, BJP MLA awmchhun O Rajagopal chauh chuan a dodal rin a ni.