Russia-in anti-aircraft missile system supply inpeih
Russia chuan India hnena Triumf anti-aircraft missile system 400 supply turin a inbuatsaih a, hemi chungchang hi ram pahnihte hian an sawidun mek tih a sawi.
Russia Deputy Prime Minister Dmitry Rogozin chuan S-400 anti-aircraft missile system pre-contract hi buaipui mek a nih thu sawiin, mahse hun eng chen nge mamawh a nih dawn erawh sawilawk a harsat thu a sawi. Ram pahnih sorkar te hian inremna hi an siam tawh a, supply kalpui dan tur hi an la sawi dun mek tih tarlan a ni.
Sorkar laipui chuan nikum October 15 khan Russia hnen aṭanga Triumf air defence system lei turin inremna siam a nih thu a lo puang tawh a, a ralthuam lei tur hi US dollar tluklehdingawn nga chuang man a ni dawn a ni. Ram pa-hnihten hian Goa-a BRICS Summit neih denchhena Prime Minister Modi leh Russian President Putin-te’n meeting an neih zawh hnuah inremna an siam thu hi an puang tawh a ni.
S-400 Triumf long-range air defence missile system hian km 400 chinah aircraft, missile leh drone-te a kap thla thei dawn a ni.
India leh Russia hian aircraft leh automobile siam hna thawh dun an remti bawk. Ningani khan PM Modi leh Russia President Putin-te chu St Petersburg-ah inkawmin, trade leh economy lama thawhdunna ṭha zawk siam dan turte an sawidun. Putin chuan ram pahnihte insumdawn tawnna hi a tlakhniam hnuin, kuminah chuan 29%-in a pung chho niin a sawi. Ram pahnihte chuan infrastructure, technology, pharmaceutical, aircraft, automobile manufacturing, diamond industry leh agriculture lama thawhdunna tur project 19-ah inremna an siam thu a tarlang.