India President 15-na atan Droupadi Murmu lakluh a ni

Droupadi Murmu chu nimin khan India President 15-na atan rinawmna thu tiam tira lakluh a ni a, a term hi July 24, 2027 thleng tur a ni.

Kum 64 mi, Murmu hi tribal zingah India President ni thei hmasa ber leh, hmeichhiate zingah he dinhmun luah thei pahnihna a nih bakah, India President ni thei naupang ber a ni bawk.

Chief justice of India NV Rama chuan Parliament-a central hall-ah Murmu hi rinawmna thu tiam tirin President atan a lalut a ni. Lakluh inkhawmah hian President hlui Ram Nath Kovind, vice president kalchhuak tur M Venkaiah Naidu, prime minister Narendra Modi leh Congress president Sonia Gandhi-te pawh an tel. President Murmu-i state, Odisha chief minister Naveen Patnaik, Lok Sabha speaker Om Birle leh party hrang hranga MP-te pawh an tel bawk.

Lakluh a nih hnua thu a sawiah, President Murmu chuan India-in a zalenna champha kum 75-na lawmna a neih lai meka President a ni thei chu lawmawm a ti takzet tih a sawi a, India-in independent a hmuh hnua piang zinga India President ni thei hmasa ber a ni tih a sawi bawk.

President thlannaah Murmu hian vote tla aṭangin 64% chuang a hmu phak a, a vote hmuh hlut zawng hi 6,76,803 a ni. A khingpui Yaswant Sinha vote hmuh hlut zawng chu 3,80,177 a ni.

President thar thusawi ṭhenkhatte -
1) President atana thlan tlin ka nih hian India ramah mi rethei ber pawhin duhthusam leh hmathlir sang tak neiin, chungte chu a tihhlawhtling thei tih a tilang a ni.
2) Tribal chhungkuaa piang, hmeichhe naupang rethei tak khan constitution post sang ber a chelh tur hian India ram democracy ropui leh thiltihtheihna a lantir a ni.
3) Odhisha-a tribal khaw te tak teah seilianin, lehkha zir theih ringawt pawh ka tan chuan duhthusam a ni. Harsatna tam tak awm chungin tumruh taka beiin, kan khua aṭangin hmeichhia zinga college kal thei hmasa ber ka ni. Tribal society ami ka ni a, Ward Councillor aṭangin President thlengin ka ni thei ta. Hei hi mother of democracy, India ram ropuina chu a ni. Hmeichhe dangte pawh intichak a, kawng hrang hrangah ram tana tha thawh tam zel turin ka duh a ni.
4) Preisdent ka ni thei hi ka mimal hlawhtlinna a ni lo, India rama miretheite hlawhtlinna a ni zawk.
5) India ram mipuite, a bikin ṭhalai leh hmeichhiate, he dinhmun ka luah chhung chuan an ṭhatna tur chu ngaih pawimawh a ni zel ang.