President hlui a bungalow tharah insawn nghal

President kalchhuak, Ram Nath Kovind chu a chenna thar tur, 12 Janpath road-ah nimin khan a insawn ve nghal. President hlui awmna tur bungalow-ah hian union minister hlui Ram Vilas Paswan pawh a lo awm tawh ṭhin a ni.

Amah thlak tura Droupadi Murmu lakluh a nih hnuah, Ram Nath Kovind hi Rashtrapati Bhavan aṭangin a in thar turah hian a insawn lut ve nghal a ni. President hlui hi type-8 bungalow pek a ni. Type 8 bungalow-ah hian room pasarih bakah a in enkawltu awmna tur quarters a tel bawk.

President hlui hian pension, thla khatah Rs nuai 1.5 a lak bakah, a nupui Savita Kovind chu thla tin secretarial support Rs 30,000 pek a ni bawk ang. Car leh driver pek a ni dawn bawk a, Delhi police-ten venhimna an pe zui bawk ang.

President’s Emoluments and Pension (Amendment) Act, 2008 hnuaiah President hlui hian private secretary pakhat, additional private secretary pakhat, personal assistant pakhat leh peon pahnih a la nei thei dawn a, kum khatah office expenditure atan Rs 60,000 a dawng bawk ang. Landline phone pahnih, mobile phone, broadband leh internet connection a thlawna pek a ni a, electric leh tui bill a chawi dawn lo bawk a ni.