A programme neihna tura PM thlalak tar vangin Delhi Chief Miniser Kejriwal a kal duh lo

Delhi chief minister Arvind Kejriwal chuan Pathiannia Lieutenant Goveror Vinai Kumar Saxena nena tree plantation programme an hmanna turah banner tar thlaka prime minister Modi lanna poster tar a nih avangin a kal duh lo.

Aam Aadmi Party (AAP) chuan Prime Minister Office chu CM hun hman tur hi 'hijack' ah an puh. PM office thupek angin an hun hmanna tura LG leh CM thlalak lanna banner leh poster an tar chu chawpchilh taka thlakin, PM Modi-a lan telna hi an tar niin an sawi .

Delhi environment minister Gopal Rai chuan sorkar laipui chuan Inrinni zan khan PM Modi lanna banner hi plantation drive neihna tur, Asola Wildlife Sanctuary-ah tar turin police-te a tir a ni, a ti. Police-hian AAP sorkarin banner a lo tar tawh chu pawtthlain, Modi lanna hi an tar a, an banner tar khawih chu manah an vau zui bawk tih news conference a neihah a sawi a ni.

Gopal Rai chuan AAP sorkar hun hmanna tur chu PM Modi-a political event-a lantir an tum niin sorkar laipui a puh. Hei vang hian CM Kejriwal nen he programme-ah hian an tel ve ta lo tih a sawi bawk.

Police-te chu mipuite himna ngaihtuahtu tur an ni a, PM Modi banner tara buai tur an ni lo, tiin Delhi police-te chungchang chu a sawi zui bawk a ni.