Sorkarin private medical college 32 admission tih thar khap

Union health ministry chuan ramchhunga privte medical college 32-te chu kum nih chhung atan zirlai admission tih thar a khapsak a, mahse heng college hrang hranga zirlai awm mekte hi an zir chhunzawm phalsak an ni thung.

Health and Family Welfare-a joint secretary Arun Singhal chuan heng college-te hi hawn chhunzawm tlak loh nia sawi chungchangah, sorkarin zirlai awm mekte chu an zir chhunzawm a phalsak em tih erawh tarlan a ni lo tih a sawi. Private medical college 32-ah hian zirlai 4,000 vel an awm mek a ni.

Ramchhungah medical zir duh an pun zel avangin private college pawh eng emaw zat din a ni a, mahse hei hian eirukna a tihhluar bakah zirna pawh a tlakhniam phah nia sawi a ni. Kum 2016, May thla khan Supreme Court chuan medical college hrang hranga zirna kalpui dan enfiah a, kalhmang ṭha zawk duangtu tur Medical Council of India-a eirukna thleng ṭhin nia sawi chhuichiang turin member pathum awmna, Oversigth Committee (OC) a din a, chief justice hlui ML Lodha-a’n a ho a ni.

Court panel din a nih hnu hian MCI chuan kum 2016 chhung khan college thar 109-te a endik a, college 17 hnenah chauh phalna a pe a ni. MCI thutlukna siam hi panel chuan ennawnin, college 34-te chu zirlai an lak a phalsak a ni. Panel-in a phalsak college-te hian criteria-te chu an zawm vek ang tih an sawi a, mahse an zawm loh chuan an sum deposit pawh chanin kum hnih chhung atan admission an tih chhunzawm phalsak an ni dawn lo tih pawh hriattir an ni.

Nikum September thla khan HT investigation chuan heng college hrang hrangte hi chhui chiangin, panel-in phalna a pek zinga pahnih chauh chuan infrastructure an nei ṭha niin a sawi.