Maha-ah loneituten nawrh chhunzawm zel

Maharashtra Chief Minister Devendra Fadnavis-a’n loneitute leiba ngaihdamna tur puang mah se, nawrh huaihawt mek loneitute chuan nawrh tihtawp an tum lo tih an sawi.

Maha CM chuan loneitute leiba ngaihdamna tur hi kumin October 31 aṭangin kalpui ṭan a ni dawn tih a sawi a, mahse he ngaidamna hi ram acre nga-a zau nei chin tan a ni ang. Sorkarin leiba a ngaihdam tur hi loneitu nuai 40 velin an chhawr dawn niin a sawi.

Fadnavis chuan sorkarin loneitute thil phut zinga a tam zawk tihhlawhtlin a tiam chungin nawrh an la titawp duh lo a, he thilah hian midang inrawlh an awm niin a sawi. CM chuan eptu party, Congress leh NCP chu an hminghmerhin sawilang lo mah se, state chhunga buaina chawk chhuak a, loneituten nawrh an huaihawt mek titawp lo tura duh an awm thu a sawilang a ni. CM chuan a kaihhruai sorkarin loneitute loan a ngaihdam sak ang chu state dangah an la ti ve ngai lo tih sawiin, he thil hi loan ba ngaihdamna lian ber a ni dawn tih a sawi.

NCP hotu Sharad Pawar chuan nawr huaihawt chungchangah political party-te an inrawlh lo tih a sawi thung a, state sorkar chu a mutthluk avangin a kaiharh nan loneitute chuan nawrh an huaihawt a ni tiin, CM chuan nawrh tihtawp a nih theih nan loneitute inkarah inhriatthiam lohna siam a tum a ni, a ti.