UP-a Bus leh Truck insu-ah mi 24 kanghlum

Uttar Pradesh-a Bareilly bula National Highway 24-ah nimin zing khan bus leh truck an insu a, bus hi kang zuiin mi 24 an kanghlum.

Bus leh truck insu-ah hian mi 15 in hliam an tuar bawk a, damdawi-in hnai berah hruai nghal niin an zinga paruk chuan dinhmun a ṭha hle nia sawi a ni.

Chief Minister Yogi Adityanath chuan thi chhungte hnenah hian cheng nuai hnih ṭheuh leh, hliam tuarte hnenah Rs 50,000 ṭheuh pek an nih tur thu a sawi.

Prime Minister Narendra Modi pawhin chetsualna thlenga thite a awrhpui thu a sawi a, hliam tuarte chu ṭha taka an damchhuah leh thuai a duhsak thu a sawi. PM chuan thi chhungte chu Prime Minister National Relief Fund (PMNRF) aṭangin cheng nuai hnih ṭheuh leh, hliam tuarte chu Rs 50,000 ṭheuh pek an nih tur thu a puang nghal bawk.

Chetsualna thlen hun hi zing lam dar 2.30 vel a ni a, Inverted Univeristy bula thleng niin bus hi New Delhi aṭanga Gonda pana tlan a ni a, truck hi Lucknow aṭanga tlanchhuak a ni bawk. Motor pahnih an insut vang hian bus fuel tank chu puakin a kang zui ta a ni. An insut hma hian bus driver hian a khalh chak hle nia sawi a ni a, mahse hei hi finfiah a la ni lo.

Police official-te chuan hliam tuar zingah dinhmun ṭha lo tak tak an awm avangin thi zat pawh hi an la punchhoh a rinawm niin an sawi.