J&K-ah firfiak pali kaphlum

Jammu and Kashmir-a Bandipora district-ah Central Reserve Police Force (CRPF)-te chuan nimin zing khan CRPF camp beitu firfiak pali an kaphlum.

Firfiakte hian zing dar 4:10 vel khan Sumbal biala CRPF 45 Battalion camp chu grenade-a vawm­in silai an hmetpuak zui a ni. Sipaite hian lo kap let ve nghalin, anmahni pui tur hian police pawh tirh luh nghal an ni.

CRPF Deputy Inspector General M Dinakaran chuan firfiakte hian camp chhung hi luh an tum a, mahse sipai duty leh Sumbal Police-te chuan an lo dang thei a, firfiak pali-te chu an kaphlum niin a sawi. Security force zingah thi an awm hriat a ni lo.

Firfiak pali-te kut aṭang hian ralthuam pawh enge emaw zat man a ni bawk a, heng zingah hian AK-47 rifle leh UBGL (Underbarrel Grenade Launcher) pawh a tel. Camp beitu firfiakte hi tute nge a nih tih hriat­chian an la ni lo.

Kar kalta Inrinni khan Kashmir chhim lam, Lower Munda-ah firfiakten Army convoy beiin sipai pahnih an kahhlum bakah midang pali-in hliam an tuar a, pawikhawihtute hi an tlanchhe hman a ni.