CBI-in NDTV hotu chenna in dap

Central Bureau of Investigation (CBI) chuan nimin khan private bank-in sum tam tak a hloh phahnaa inrawlha puh, New Delhi Television (NDTV) co-founder leh executive co-chairperson Prannoy Roy-a chenna in an dap.

CBI hian Roy leh a nupui Radhikha bakah news channel promoter RRPR Hodlings chu ICICI bank-in cheng vaibelchhe 48 an hlohnaah mawhphurtuah puhin an lakah thubuai a ziaklut a ni. CBI team hian New Delhi leh Dehradun-a hmun pali an dap a, New Delhi-a Roy-a chenna Greater Kailash ami chu member pasarih awmna team in an dap a ni.

Nikum khan Rajya Sabha MP Subramanian Swamy chuan Prime Minister Narendra Modi-a hnenah lehkha thawnin, NDTV-in sum a khawih danah thil dik tawk lo a awm niin a lo sawi tawh a ni. Swamy hian Prevention of Corruption act hnuaiah hian NDTV lakah thubuai ziak lut tura CBI hriattir turin PM hi a ngen a ni.

Kar hmasa khan CBI chuan kum 2008-a ICICI Bank aṭanga Holding company-in loan a lak chungchangah thil dik tawk lo a awm nia sawiin thubuai hi a ziak lut a ni. Company hian loan cheng vaibelchhe 366 ala a, mahse a kum lehah a loan lak aia cheng vaibelchhe 50-a tlem zawka rul turin ruahmanna an siam a ni, a ti. CBI chuan RRPR bakah bank official ṭhenkhatte lakah inbumna hmanga thubuai siam a nih thu an sawi.