Parliament Monsoon session chhung atan Congress LS MP 4 hrem

Eptu party-ten ram chhunga thil man sang zel leh GST rate tihsan a nih chungchang sawiho an phutna avangin Parliament Monsoon session neih mekah eptu leh sorkar laipui lam an inbei na zel. Nimin khan an thil phut chungchang lehkha ziak kenga lantirtu, Congress party MP pali-te chu an chet dan a mawi lo nia sawiin, Lok Sabha speaker Om Birla chuan tun session chhung atan a hrem.

Congress party chuan sorkar laipui chu eptute che thei lo tura siam tumah puhin, House-ah an thil phut tihlawhtling turin an bei zui zel dawn tih an sawi. Party hruaitu, Shashi Tharoor chuan Congress MP palite hrem a ni chu thil awm lo tak, eptute leh sorkar laipui inkar boruak tichhe zualtu a ni, a ti.

Hetihlai hian Speaker Birla chuan House chhunga thu ziak, placard keng phal a ni lo tih sawiin, hei vang hian Congress MP-te pawh hrem an nih thu a sawi a ni. MP pali hremte chu - Manickam Tagore, T.N.Prathapan, Jothimani leh Ramya Haridas-te an ni. Speaker chuan member-te chu House chhungah placard keng lut lo turin a ngen zui nghal bawk.

Rajya Sabha-ah pawh tun kar chhung atan eptu MP 19 hrem an ni bawk. House chairman M Venkaiah Naidu chuan nimin khan eptu member-te hi rorel thei loa House-a an auhbuai avangin tun kar chhung atan session-a tel thei lo turin a hrem a ni. Rajya Sabha MP hrem zingah hian Trinamool Congress MP pasarih an tel.