CBI court-ah Lalu Yadav inlan
Rashtriya Janata Dal (RJD) hotu leh Bihar Chief Minister hlui ni bawk Lalu Prasad Yadav chu ranchaw man tihchingpen thubuaiah nimin khan Central Bureau of Investigation (CBI) special court-ah a inlan.
Bihar CM hlui dang, Jagannath Mishra pawh he thubuaiah vek hian CBI special court-ah a inlan ve bawk.
Lalu Prasad leh Mishra-te hi ranchaw man tihchingpen thubuaiah hian thiam loh chantirin jail-ah an tang ve ve tawh a, tunah hian bail-a chhuahtir mek an ni.
Lalu Prasad a chief minister laiin Bhagalpur treasury aṭangin dawt hmangin ranchaw man tur cheng nuai 47 lakhchhuah a ni a, kum 1996 khan he mi kaihhnawihah hian CBI chuan thubuai an ziaklut a, he thila inhnamhnawiha puh mi 44 hming an tarlan zingah Lalu Prasad leh Mishra-te hi an tel a ni.
Jharkhand High Court chuan ranchaw man tihchingpen kaihhnawih thubuai pakhatah thiam loh chantir a nih tawh avangin a thubuai dang neihte chu a tihtawp sak a, mahse hei hi CBI chua kum 2014 khan a khing let a ni.
Hetih lai hian Yadav-a fanu, MP Misa Bharti leh a pasal chu dik lo taka ram lei leh chhiah awlrua puh chungchangah Income Tax Department chuan thu zawhfiah turin an ko bawk. Department official-te chuan Bharti leh a pasal Shailesh Kumar-te hi New Delhi-a investigating officer hmaa inlan turin an ko.