UP-ah bawng talh leh tawlhrute NSA hnuaiah hrem theih

Uttar Pradesh sorkar chuan bawng talh leh talh tura tawlhru ṭhinte chu National Security Act (NSA) leh Gangters Act hnuaiah hrem theih an nih tur thu a sawi. He thupek hi district police hotu hrang hrang hnenah state Director General of Polcie Sulkhan Singh chuan a hriattir tawh a ni.

Hetih lai hian Bihar Chief Minister Nitish Kumar chuan Uttar Pradesh-a BJP sorkarin bawng humhalh nana a hmalak tum dan chu bei letin, kawtthlera bawng teihawi tam tak te chu awmna siamsak zawk turin a ti. Nitish Kumar chuan BJP chuan bawng humhalh an duh takzet a nih chuan kawngpuia bawng leh lawi tla ṭhinte awmna tur ṭha tak siamsak se a duh thu sawiin, UP chu khawlaia plastic lam chi thil ei avanga bawng thi tamna ber a nih thu a sawi. BJP sorkarna state hrang hrangah bawng humhalh tum chhuanlamah hmanga pawikhawihna thleng a hluar thu a sawi bawk a, sorkar laipuiin talh tura bawng hralh khapna a siam te chu thil awmlo tak a nih thu a sawi.

BJP leh a thurualpui pawlten bawng humhalh chhuanlama pawi an khawih leh, boruak an siamchho chu BJP kaihhruai NDA sorkarin inthlan dawn a thutiam hrang hrang a hlen chhuah loh thup tuma an hmalaknaah Nitish Kumar chuan a puh.

UP sorkarin dan loa ran talhna hmun siam a khap chungchang pawh sawichhuakin, he dan hi Bihar chuan kum 1950-ah a lo siam daih tawh a ni, a ti. Bihar chuan enkawltu nei lo bawng lakkhawmna tur hmun Patna-ah a siam dawn tih a sawi bawk.