Bihar-ah Lei dawh thar chim

Bihar-a Gopalganj district-a Sattarghat Mahasetu bridge (lei) chu hawn a nih aṭanga ni 29-na, Nilaini khan a chim a, he lei chimah hian thi leh hliam an awm lo.

He lei hi kum 2012 April-a dawh ṭan a ni a, vaibelchhe 264.47 senga siam niin  Gandak lui chunga dawh lei hi kilometre 1.4 a thui a ni. He lei siam hna thawktute hi Bihar Rajya Pul Nirman Nigam Ltd an ni. June 16 khan Bihar chief minister Nitish Kumar chuan a hawng a, tui chim chin a san avanga a culvert a nghet loh vangin a chim zui ta ni tiin official-te chuan an sawi.

Lei chim avang hian CM Nitish chu state party dangten an bei zui a, kum 8 chhunga cheng vaibelchhe tam tak senga siam ni 29 chhung chauh a daih mai hi ei rukna thil a nih an rin thute an tarlang. Kum 2017-a lei dawh a nih lai khan lei chhun vuma tui daidanna siam chu sazu ten an reh pawp zel avanga harsatna an tawh thu Nitish minister-te chuan an lo sawi tawh a ni, hei vang hian tuilian hial te pawh a thlen niin an sawi bawk.