India aṭanga inlakhran duhtu pawl 2 hotu man

Jammu and Kashmir police-te chuan India aṭanga inlakhran duhtu pawl pahnih, Jammu and Kashmir Liberation Front chairman Yasin leh Hurriyat Conference hotu Mirwaiz Umar Farooq-te an man.

Hruaitu pahnihte hian Srinagar-ah Hurriyat Conference hotu Syed Ali Shah Geelani chu meeting neihpui an tum a, mahse meeting neih hmain man an ni.

National Investigation Agency (NIA) chuan kar kalta Inrinni leh Zirtawpni khan J&K-a inlakhran duhtu pawlten Pakistanaṭanga ṭanpuina sum an dawn ṭhin chungchang leh, heng sumte hi Kashmir Valley-a pawikhawihna leh tharum thawhna chawh chhuahna atan an hmang ṭhin nia sawi chungchangah inlakhran duhtu pawl hotute chenna in leh office-te an lo dap tawh a ni.

NIA hian Kashmir, Delhi leh Haryana-a hmun hrang hrang dapin, firfiak pawl Hizbul Mujahideen leh Laskhar-e-Taiban (LeT) letterhead, laptop, mobile phone, rangkachak tlereuh leh pwisa fai cheng vaibelchhe 2.5 an man tel a ni. NIA-in chenna in an dapsak te hi Hurriyat thupuangtu Ayaz Akbar, Geelani makpa Altaf Fatoosh leh Mirwaiz-a lamṭang pawl thupuangtu Shahidul Isam te in a nia, anni bakah hian sumdawng ṭhenkhat pawh enfiah tur list-ah hian an tel bawk.

Inlakhran duhtu pawl chuan NIA thiltih dan hi an pawl vau tumna niin an sawi a, sorkar chu Kashmir economy tichhiat tuma sumdawng mite bitumah an puh bawk.